Ekitaldia Finlandiako Tampere hirian izan da 2024ko maiatzaren 21etik 23ra.
THCS, Transforming Health and Care Systems (Europako Osasun Sistemak Eraldatzen) lankidetzak lantegi bat egin du, workshop, Europan osasun ekosistemak indartzeko bideari ekiteko. 2023ko maiatzean Vienan egindako tailerrean lehen urratsak eman ondoren, osasun-ekosistemetan zentratutako lantaldea berriro bildu da erreferentzia izan daitezkeen Europako herrialdeetan ekosistema eraldatzaileak identifikatzeko. Lankidetzaren esparruan egiten ari den lanaren helburua da osasun-ekosistema bat eraldatzailetzat jotzen duten ezaugarriak identifikatzea eta definitzea. Era berean, dagoeneko existitzen diren ekosistemak arrakasta-kasua aurkeztera erakartzeko eta Europako beste herrialde batzuekin ezagutza eta esperientzia partekatzeko estrategia bat taxutzen ari da lantaldea.
Hainbat eskualdetako ordezkariek parte hartu duten topaketaren lehen egunean, Italiako, Erresuma Batuko eta Finlandiako hainbat ekosistema aurkeztu dira, haien arrakasta kasuak nabarmenduz. Tampereko topaketak Tesomako tokiko ekosistemaren instalazioak bisitatzeko ere balio izan du. Tampereko Udalaren eta Pirkkala barrutiaren lankidetzak, osasunaren sektore pribatuko eragileekin eta GKEekin batera, inguruko biztanleei zerbitzu soziosanitarioak eskaintzen dizkien zentro bat eraikitzea lortu dute. Egindako lanari esker, Tesoma inguruko biztanleek ikusi dute, bizilagunen zerbitzuak hobetzeaz gain, osasun-emaitzak eta bizi-kalitatea nabarmen hobetu direla.
Biosistemak Euskadiko osasun-ekosistemari balioa emateko asmoz parte hartu du workshopean, 2030erako PCTIren esparruan erakundeen artean gauzatzen ari den lankidetza-ikuspegia emanez.
Hurrengo urrats gisa, lantaldeak ekintza batzuk ezarri ditu nazio- eta eskualde-mailako ekosistema eraldatzaileak identifikatzeko, haien arrakasta ahalbidetu duten faktoreak eta testuingurua aztertzeko asmoz. THCS taldeak beste tailer bat egingo du 2024ko udazkenean Vienan, egindako lanaren urteko balantzea egiteko eta lankidetzaren esparruan hurrengo mugarriak ezartzeko.
THCS lankidetzari buruz gehiago jakin nahi baduzu, bisitatu haren webgune ofiziala: https://www.thcspartnership.eu/
