Gure barne-kanalaren plataforman sartzean, orri nagusi batera iritsiko zara, eta han kanalaren alderdi orokorrak gogoratuko zaizkizu. Informazioa ematen dutenentzako eta eraginpean dauden pertsonentzako gure pribatutasun-politikei buruzko informazio zehatza irakurri ahal izango duzu bertan.

Hortik, zure informazioaren xehetasunak adierazteko formulariora sar zaitezke. Idatziz zein audio-grabazio seguru batean eman ahal izango duzu informazioa, eta, nahi izanez gero, dokumentazio gehigarria erantsiko duzu. Zure nortasuna babesteko neurri teknikoak aplikatzen ditugu; horretarako, fitxategietako metadatuak ezabatuko dira, ahotsa distortsionatuko da eta edozein informazio-truke enkriptatuko da.

Formularioan hitzordua eska dezakezu kudeatzailearekin, informazioa bertatik bertara azaldu edo zabaltze aldera. Eskaera egin eta gehienez ere 7 eguneko epean adostuko da hitzordua, ondoren azalduko dugun web-guneko jarraipenerako eremu pribatuaren bidez.

Ahozko komunikazioak dokumentatu beharko dira, eta, horretarako. aldez aurretik informatzailearen baimena lortu beharko da. Komunikazioa formatu seguru, iraunkor eta irisgarri batean grabatuko da, edo komunikazioaren transkripzio osoa eta zehatza egingo da. Datuak babesteko araudiaren araberako eskubideak alde batera utzi gabe, informatzaileari ahal den guztietan eskainiko zaio elkarrizketaren transkripzioa egiaztatu, zuzendu eta bere sinaduraren bidez onartzeko aukera.

Inprimakia bete denean, zure komunikazioaren erregistroa baieztatuko dizugu, eta jarraipenerako eremu pribatura sartzeko gakoa emango dizugu. Bertan, nahi izanez gero, zure kasua egiten ari den bidea ezagutu ahal izango duzu, eta kudeatzailearekin harremanetan jarri eta informazioa eta dokumentazioa trukatu ahal izango dituzu, betiere modu erraz, seguru eta konfidentzialean. Gako hori behar bezala gorde beharko da, konfidentzialtasun-arrazoiak tarteko ezin baita berreskuratu, eta galdu edo ahaztuz gero, informazioa berriro bidali beharko diguzu.

Kasua kudeatzen den bitartean, informazio osagarria eska dakizuke jarraipenerako eremu pribatu horren bidez; beraz, komeni da aldian behin eremu horretan sartzea eta zure egoera berrikustea. Nahi izanez gero, jarraipenerako eremu pribatura sartzeko gakoak ematean, helbide elektroniko bat emateko aukera emango zaizu. Helbide elektronikoa ematearen helburu bakarra izango da berriak daudela ohartaraztea, hala badagokio.

Kasuaren kudeatzaileak, bidalitako informazioa aztertu ondoren, informazioa tramitatu daitekeen ala ez zehaztuko du. Gero, komunikazioa tramitera onartu den ala ez adierazteko jakinarazpena bidaliko dio informatzaileari.

Komunikazioa tramitera onartzen bada, barne-ikerketa abiaraziko da eta gehienez ere 3 hilabeteko epean (kasuaren konplexutasunagatik, 6 hilabetera arte luzatu ahal izango da) azken ebazpenaren nondik norakoak jakinaraziko zaizkizu.